(ФОТО+ВИДЕО) Пендаровски до Јан Копман: Ви благодарам за поддршката од ЕК, ама потребна е забрзана интеграција на земјите од Западен Балкан

Претседателот Стево Пендаровски денеска ги прими Герт Јан Копман, генералниот директор и Микела Матуела, вршителка на должност директорка за Западен Балкан на Генералниот директорат за соседство и преговори за проширување на Европската Комисија.

На средбата се разговараше за актуелните состојби во државата, за текот на скрининг процесот, за односите со соседството и регионот на Западен Балкан во контекст на евроинтеграциите, како и за процесот на проширување на Европската Унија, информираат од Кабинетот на претседателот во писмено соопштение испратено до медиумите.

На средбата Пендаровски се заблагодарил за поддршката од Европската Комисија за македонските евроинтеграции, но и укажал за потребата за забрзана интеграција на земјите од Западен Балкан.

„Соговорниците разменија мислења и информации и за состојбите и перспективите на земјите во регионот, во поширокиот геополитички и безбедносен контекст, предизвикан од војната во Украина.

Претседателот Пендаровски, изразувајќи благодарност за контиунираната поддршка од Европската Комисија за македонските евроинтеграции, ја истакна потребата од забрзана интеграција на земјите од Западен Балкан која позитивно ќе влијае врз безбедноста, севкупните политички процеси и реформската агенда, како и врз евро-оптимизмот во регионот“, се вели во соопштението од Кабинетот на Пендаровски испратено до медиумите.