Ескалираат тензиите во Газа: 85 лица убиени за една ноќ, Израел разрешува високи функционери

Најмалку 85 Палестинци беа убиени низ Газа во текот на ноќта, со што бројот на загинати откако Израел го прекрши примирјето со палестинската група Хамас се искачи на речиси 600, соопштија локалните здравствени власти.

Најмалку 16 лица, главно жени и деца, се убиени во напад во текот на ноќта врз семејната куќа Абу Дака во близина на градот Кан Јунис, пренесе АП.

Министерството за здравство на Газа соопшти дека најмалку 592 лица биле убиени во израелските напади во изминатите неколку дена.

Истовремено, израелската војска објави дека во нападите биле убиени шефот на службата за внатрешна безбедност на Хамас, како и уште двајца команданти.

Владата на израелскиот премиер Бенјамин Нетанјаху едногласно гласаше за разрешување на шефот на израелската разузнавачка агенција Шин Бет, Ронен Бара, соопшти кабинетот на премиерот.

Последниот работен ден на Бара е закажан за 10 април, а разрешувањето ќе биде забрзано од првично планираниот датум на 20 април, иако кабинетот на Нетанјаху вели дека тој може да биде разрешен пред тој датум доколку министрите го одобрат назначувањето на нов шеф на агенцијата.