МП: Барлет Џафери има положено правосуден испит на 05.02.2015 година, потпис ставил министерот Јашари

Штотуку се огласија од Министерството за правда во врска со случајот на синот на Талат Џафери.

„Во врска со случајот  со Барлет Џафери кој го водеше Државната комисија за спречување на  корупција  Ве информираме дека согласно евиденционата тетратка за положени кандидати што се води во Министерството за правда и е од трајна вредност, лицето Барлет Џафери има положено правосуден испит на 05.02.2015 година. Потписот за положен правосуден испит го ставил министерот за правда кој ја извршувал функцијата во 2015 година“, велат од МП.

Функцијата министер за правда во 2015 година бил Аднан Јашари од ДУИ. Поточно неговата функција стапила од 19 јуни 2014 до 5 април 2016. 

„Во врска со наводите на ДКСК за немањето документација за положен правосуден испит на Џафери, Ве информираме дека согласно член 27 од Уредбата за канцелариско и архивско работење (“Службен весник на РМ”,  бр.01/14), министерот за правда секоја година носи листа на документиран материјал со рокови за негово чување за потребите на Министерството за правда.

Во однос на рокот за чување на документацијата во Министерството за правда, досегашната пракса била документите на кандидатите односно барањата и другата пропратна  документација на кандидатите за полагање правосуден испит да се чуваат една година.

Со цел надминување на евентуалните можни злоупотреби околу полагањето на правосудниот испит, Министерството за правда ја разгледа можноста за електронско пријавување на правосудниот испит преку Националниот портал Е-услуги. На тој начин кандидатите ќе ги поднесуваат своите документи по електронски пат“, информираат од Министерството за правда.